Þekkingarnet Austurlands

Þróunarfélag Austurlands og Þekkingarnet Austurlands í samvinnu við Útflutningsráð Íslands munu bjóða upp á námskeið í markaðssetningu á netinu byggt á samnefndri bók sem var að koma út. Kennarar eru Guðmundur Arnar,  markaðsstjóri hjá Icelandair og Kristján Már hjá Nordic eMarketing.

Um hvað snýst námskeiðið?

Farið verður yfir helstu samskiptaleiðir netsins á hagnýtan hátt  með áherslu á ferðaþjónustu og hvernig samskiptaleiðir netsins geta skapað miklar tekjur.  Markmiðið er að þátttakendur öðlist þekkingu sem nýtist þeim strax í starfi.

Kennslan byggir á bókinni „Markaðssetning á netinu“ en bókin er  innifalin í þátttökugjaldi námskeiðsins.

Námskeiðið stendur frá kl. 11:30 – 16:00  þann 13. febrúar nk. hjá Þekkingarneti Austurlands á Egilsstöðum.

Verð fyrir námskeið og bók er 18.500kr.

Skráning er hjá Þekkingarneti Austurlands á netfangið Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það. eða í síma 471 2838 fyrir 11. febrúar.

Helstu þættir:
– Netið, breytingar og tækifæri 
– Staðan í dag
– Vefborðar
– Leitarvélar
– Samfélagsmiðlar
– Kaffi, smá pása og spjall
– Tölvupóstar
- Vefgreiningartól

Um bókina sem er innifalin í námskeiðinu:

Bókin „ Markaðssetning á netinu“ hefur það að leiðarljósi að vera hagnýt verkfærakista fyrir íslenskt markaðsfólk sem er eða vill byrja að nota netið í sínu markaðsstarfi.  Í henni er fjallað um allar helstu samskiptaleiðir netsins. 

Bókin er jafnframt full af nýjum innlendum og erlendum rannsóknum um notkun fólks á netinu og hvernig ná má hámarksárangri.  Ennfremur eru í bókinni fjölmargar íslenskar dæmisögur og tölur sem íslenskt markaðsfólk getur nýtt sér í daglegu störfum.

Í dag er allt markaðsstarf meira og minna unnið með netið í huga.  Bókin kynnir nýjar áður óbirtar rannsóknir  sem sýna hversu langt Íslendingar hafa náð í notkun netsins.  Tækifæri íslenskra fyrirtækja eru því fjölmörg.

Eftir námskeiðið og lestur bókarinnar ætti fólk að vera mun betur upplýst um:
• …þær breytingar sem orðið hafa á hegðun neytenda
• …hið breytta umhverfi sem fyrirtæki og vörumerki starfa í
• …þau fjölmörgu tækifæri sem eru á netinu í dag og hægt er að nýta með litlum tilkostnaði
• …hvernig ná má hámarksárangri með vefborðum
• …hvernig ná má hámarksárangri með leitarvélum
• …hvernig ná má hámarksárangri með samfélagsmiðlum (Facebook o.s.frv.)
• …hvernig ná má hámarksárangri með tölvupóstum
• …hvernig netið kemur inn í hefðbundnar birtingaáætlanir
• …á hvern hátt vefgreiningartól virka og hvernig best er að nota þau
• …og fleira og fleira!

Fyrirlesarar og höfundar bókarinnar „Markaðssetning á netinu“

Guðmundur Arnar Guðmundsson er hagfræðingur frá Acadia University í Kanada og með MBA gráðu frá Háskóla Íslands.  Hann hefur ritað fjölda greina um viðskipti og markaðsmál í tímarit og blöð á Íslandi og situr í stjórn ÍMARK, félags markaðsfólks á Íslandi.  Hann hóf störf við markaðsmál hjá 365 ehf en flutti til Englands 2006 og starfaði þar hjá Icelandair sem markaðsstjóri breska sölusvæðisins.  Nú starfar Guðmundur Arnar í markaðsdeild Icelandair á Íslandi og fer fyrir markaðsstarfinu á Íslandi, hann sér um markaðsrannsóknir fyrirtækisins ásamt því að koma að stefnumótandi uppbyggingu vörumerkisins Icelandair.

Kristján Már Hauksson hefur komið víða við hann lærði rafeindavirkjun í Iðnskólanum í Reykjavík, kerfisfræði við Tölvu og verkfræðiskólann og er með internet markaðsfræðigráðu frá University of British Columbia. Hann stofnaði Nordic eMarketing og starfar þar sem sviðsstjóri net- markaðssetningar.  Þar sérhæfir hann sig í  leitarvélamarkaðssetningu og net-almannatengslum (ePR – Online PR).  Kristján Már stofnaði íslenska SEO/SEM samfélagið og skrifar reglulega á Multilingualsearch.com.  Kristján hefur unnið við netlausnir síðan 1996 og leitarvélamarkaðssetningu frá 1999. Hann er vinsæll fyrirlesari um þessa nýju miðla jafnt innanlands sem utan og hefur haldið fjölmörg námskeið.